Betano, 02 Marsu 2026, Instituto Politécnico de Timor Leste (IPTL), kontínua hasa’e bandeira kada fulan ba semana dahuluk, ohin segunda (02/03/2026) ne’ebé responsavél hasa’e bandeira no koru responsavel hosi estudante Eskola Superior de Enjenharia (ESE) Turno 2023 – 2024.
Iha biban hanesan Primeiro Vise Prezidente IPTL Sr. Pedro de Deus nudar inspetor serimónia atualiza hela ba estrutura sira katak relasiona ho registrasaun estudante foun ne’ebé maka admitidu ona mai IPTL maske agora dadaun seidauk másimu tuir total número ne’ebé maka ita simu no ida ne’e maka kondisaun ita hotu nian, dehan nia. Akademista ne’e informa hela ba hotu – hotu atu nafatin sosializa ba komunidade sira konabá mudansa IPB ba IPTL atu nune’e labele mosu dúvida iha sosiedade.
Inspetor ne’e mos husu nafatin ba funsionariu sira hotu atu mantein disiplina kumpri ba regulamentu ne’ebé maka estabele ona iha IPTL , nomos husu nafatin ba estudante sira liu-liu ba finalista sira atu bele hakbesik an mai kampus hodi bele finaliza prosesu sira hotu. Nia mos aumenta tan katak liu-liu iha serimónia ofisial sira hanesan ne’e husu atu hotu-hotu bele partisipa no tau iha konsiderasaun.
Marka prezensa iha Isár badeira ohin maka hanesan Segundo Vise Prezidente IPTL, Inspetór Geral, Xefi gabineti Prezidente IPTL, Dosente husi Kursu rua, Funsionariu administrasaun no Estudante IPTL. Média IPTL
