Betano, 12 Juñu 2026 Instituto Politécnico de Timor – Leste (IPTL) akompaña hosi Primeiro Vise Prezidente IPTL Ir. Pedro de Deus Msi.,IPM, asuntu área técnico sientífiku nian nu’udar mos peskizador loke abertura ba atividade aprezentasaun rezultadu peskiza hosi dosente sira iha IPTL hamutuk ho Diresaun Nasionál Sentru Peskiza Sientífika no Servisu Komunitaria – IPTL nian ne’ebé maka realiza atividade seminariu rezultadu peskiza hosi peskizador dosente Produsaun Animal no Konstrusaun Sivil nian kona-bá aprezentasaun rezultadu peskiza durante ne’e ba avaliador sira nomos dosente sira iha IPTL.
Iha biban hanesan Diretór Diresaun Nasionál Sentru Peskiza Sientífika no Servisu Komunitaria – IPTL Sr. Abilio dos Santos L.Agp.,M.Pt
, hateten semináriu refere atu fo sai konabá rezultadu sira ne’ebé maka hahu hosi submisaun proposta to mai iha faze aprezentasaun nia rezultadu peskiza hosi peskizadór sira atu nune’e ita bele hare hamutuk ho nia kondisaun sira hodi to ba iha faze públikasaun ninian.
Entretantu aprezentasaun rezultadu peskiza refere hosi Dosente nain rua maka primeiru aprezentasaun hosi Dosente Ir. Pedro de Deus Msi.,IPM peskiza kona-bá “Produtividade no Análize Digistibilidade In Vitro Sorgum Variedade Pahat no Soper -9 ho Diferente Adubu Orgániku Fermentadu (Bokasi) Feses Karau iha Aldeia Lalika, Suku Betano, Postu Administrativu Same Munisípiu Manufahi”.
Iha fatin hanesan, aprezentasaun daruak nian hosi Dosente Konstrusaun Sivil Sr. Alexandre Marques,M.Tr.T, peskiza kona-bá “Landslide Monitoring Using Total Station Around Aituto Road”.
Objetivu hosi atividade refere atu rona no hare hamutuk aprezentsaun peskiza ne’ebé maka hala’o hosi dosente Konstrusaun Sivil nian nomos hosi dosente Produsaun Animal ne’ebé maka durante ne’e hala’o peskiza to faze aprezentasaun rezultadu hodi análiza no hare nia impaktu nomos kondisaun inklui konabá preokupasaun sira hosi peskizadór, hodi nune’e bele hadia diak liu tan antes to ba iha faze final ba publikasaun ninian.
Nomos sujestaun sira hosi avaliador atu nune’e bele hadia diak liu tan no sai referensia ba peskizador sira tuir mai. Atividade refere hala’o iha Kampus IPTL.
Partisipa iha atividade refere maka hanesan GIA – IPTL, Diretór Nasional sira, Diretor eskola superiór, xefe departamentu, kordenador Dosente sira nomos Funsionariu IPTL.
Média IPTL
