Betano, 07 Setembro 2026 – Instituto Politécnico de Timor – Leste (IPTL) kontinua hasa’e bandeira kada fulan iha primeira semana fulan setembru tinan ne’e, hasa’e bandeira ne’e responsavel hosi Estudante sira hosi Kursu Konstrusaun Sivil Turno 2025 iha resintu IPTL.
Inspetor Serimónia Sr. Xisto Constantino Pinheiro, kualidade hanesan Segundo Vise Prezidente Asuntu Administrativu no Gestaun Institusionál nian apela hela ba Sívitas akadémika tomak atu mantein disiplina no hatudu nafatin vontade serbisu liu – liu iha Pontualidade hanesan Funsionariu Públika iha Instituisaun Estudu sira hotu hodi kumpri nafatin horas ne’ebé maka orienta tuir regulamentu hosi Funsaun Públika ninian.
Iha biban ne’e mos Inspetór nafatin husu ba Kargu Xefia sira atu hatudu uluk ezemplu diak ba staff sira hodi banati tuir regulamentu sira ne’ebé iha. Alende ne’e mos husu ba Funsionariu no Sívitas Akadémika tomak atu tau prioridade atu hotu-hotu bele partsipa iha atividade solene sira hanesan Isar bandeira hodi bele tau iha hanoin no refleta ba serbisu no sakrifisiu sira ne’ebé maka ita hala’o iha serbisu fatin no hodi fo homenagen ba ita nia Símbolu Nasionál no Aswain sira.
Inspetor Serimónia ne’e mos afirma tan ita mos tama ona fim hosi Trismestral Terceiro nian (Q3) tamba ne’e nafatin dezafia ba diresaun sira hotu atu serbisu makas no aselera prosesu sira atu nune’e ita bele finaliza ita nia dezempeñu relatoriu sira hodi reajusta ba iha Sistema DBFTL nian. Aproveita mos okaziaun ida ne’e lori estrutura IPTL sira hotu nia naran hato’o parabéns ba Finalista sira hotu hosi Eskola Eskola Superiór rua ne’ebé maka finaliza ona sira nia ezame final ba tinan ida ne’e nian.
Alende ne’e mos kongratula ba Compositór músika Marsa IPTL nian Sr. Deonizio ne’ebé maka esforsu ona hodi kompete no sai hanesan manan nain ba músika Marsa IPTL nian to ohin loron ita bele hananu hamutuk. Ikus liu fo mos parabéns ba Compositór músika Marsa IPB nian Sr. Agapito Tilman ba ezistensia IPB nian durante ne’e.
Partisipa iha atividade refere solene Isár Bandeira fulan ne’e Sívitas Akadémikas no hosi Funsionariu Administrasaun IPTL.
Média IPTL
