Likisa, 10 Agostu 2026 — Instituto Politénico de Timor – Leste nia Escola Superior do Estudo e Investigação do Café (ESEIC-IPTL) identifika plantasaun kafe iha Aldeia Lisa Lara, Suku Hatuvou, Postu Administrativu Maubara, Munisípiu Liquiça, ne’ebé konsidera iha futuru bele dezenvolve sai Sentru Demostrasaun Kafe ba estudante sira hodi aprende prátika, hala’o estájiu no peskiza.
Xefe Administrasaun Geral i Finansa Sr. Moises Borromeu,SP.,MP hateten katak ekipa ESEIC mai observa diretamente plantasaun kafe ne’e hodi haree nia potensiál atu sai fatin aprendizajen ba estudante sira iha futuru.
“Ami mai observa plantasaun kafe ne’e, nune’e iha futuru estudante sira bele mai halo estudu iha fatin ne’e. Ami la promete katak iha tinan oin Governu sei apoia programa sira kona-ba Sentru Demostrasaun Kafe iha munisípiu sira, maibé ami iha prioridade atu konsidera plantasaun kafe Boraibit hanesan sentru ba ESEIC,” dehan Moises Borromeu.
Nia haktuir katak, se plantasaun ne’e dezenvolve sai Sentru Demostrasaun ESEIC, utilizasaun fatin ne’e la’ós de’it atu fó benefísiu ba estudante sira, maibé mos bele fó benefísiu ba komunidade kafekultór, liuliu liuhosi partilha koñesimentu, prátika no dezenvolvimentu tékniku iha área produsaun kafe.
Sekretáriu Suku Hatuvou, Marcelino de Jesus Chaves, apresia programa no inisiativa ESEIC ne’e tanba konsidera bele kontribui ba dezenvolvimentu lokal. Nia mós hateten katak komunidade sei koopera ho ESEIC atu apoia no tulun komunidade kafekultór sira.
Identifikasaun plantasaun kafe ne’e iha área estimadu 20 hektare, ho altitude entre 600 to’o 800 hosi tasi.
Identifika plantasaun kafe ne’e husi Koordenadór Kursu Agronomia Cafe, Sr. Francisco Barreto, L. Agrn. Xefe Administrasaun no Finansa, Moises Borromeu,SP.,MP, Dosente Aderito S. Nunes,S.Tp hamutuk ho estudante no komunidade kafekultór sira.
Fontes: Média ESEIC
