Betano, 18 Maiu 2026, Instituto Politécnico de Timor – Leste (IPTL) nia Magnífiku Prezidente Mestre Alcino da Costa Isaac A. Fernandes ho Magnífiku Reitór UNTL Profesór Dr. Joviano António da Costa M.Eng, selebra assinatura akordu Kooperasaun nomos Kontratu Programa entre Instituto Politécnico de Timor – Leste (IPTL) ho Universidade Nasionál Timor Lorosa’e (UNTL) iha resintu IPTL – Betano dader ne’e.
Objetivu Prinsipal hosi Akordu kooperasaun ne’e atu fortifika liu tan serbisu sira iha área programa sientífiku no akadémika, kultural, administrativu no Teknologia.
Magnífiku Prezidente IPTL Mestre Alcino da Costa Isaac A. Fernandes hateten, honra bo’ot agradese no orgullu ba Reitór UNTL ho nia Estrutura tomak tamba bele marka ona prezensa ho responsabilidade hodi partisipa iha serimónia asinatura Momorandum Entendimentu Entre IPTL ho UNTL, atravéz hosi akordu kooperasaun ida ne’e atu bele fortifika liu tan no sai símbolu vizaun diak ida ba futuru bazeia ba kooperasaun akadémika, Sientífika, Investigasaun hodi promove solusaun sientífika, Tékniku nomos dezempeña liu tan papel fundamental entre Instituisaun rua hodi kria dezenvolvimentu sustentabel iha Timor – Leste .
Iha fatin hanesan Magnífiku Reitór UNTL Profesór Dr. Joviano António da Costa M.Eng dehan katak kooperasaun ne’e laos buat foun ida entre UNTL ho IPTL maibé nia kontinuasaun husi prosesu anteriór ne’ebé maka lao tia ona, tantu iha area Sientífika, Akadémika Peskiza iha mos asinatura akordu ne’e mos hosi Fakuldade Engeñaria – UNTL sei iha kooperasaun espesífiku ida iha área digitalizasaun nian.
Reitór ne’e mos afirma tan katak iha Timor – Leste iha Instuisaun ida ne’ebé maka pertense ba iha Estadu ne’e maka rua ne’e UNTL ho IPTL nomos Instituisaun rua ne’e maka agora daudaun reprezenta hela Timor – Leste iha Nasional nomos Internasional, akordu ida ne’e laos buat foun maibé renovasaun husi serbisu lubuk ida ne’e estabelese ona no kontinuasaun serbisu foun sira ne’ebé atu halo ba futuru entre Instituisaun rua ne’e.
Marka Prezensa iha Serimónia Akordu Kooperasaun ne’e maka Primeiro Vise ho Segundo Vise- IPTL, Inspetór Geral – IPTL, Diretóres, Kargu Xefia Sira,Tékniku Administrasaun IPTL, Dekanu Fakuldade Engeñaria (FECT), Pro-reitor Asuntus asuntus koperasaun UNTL, Vise Dekanu Fakuldade Engeñaria, Diretór GabCedo UNTL, Tékniku nomos Secretariadu Gabineti UNTL.
Depois de asinatura hotu iha mos Magnífiku Prezidente IPTL hamutuk ho Magnífiku Reitór UNTL ho estrutura sira Vizita Kampu ba fatin foun ba Instalasaun Edifisiu Kampus Foun IPTL nian iha Otorita – Betano.
Média IPTL